نصايح قبل ما تبدء مشروع تعبئة السكر في مصر ؟

السلام عليكم ورحمة الله وبركاته 

كتير مننا عايز يعمل مشروع يكسب منه بالحلال ويكون له مربح كويس ,لان الوضع الان في مصر لايخفي علي احد ,والضرر الاكبر بيقع علي الشريحة الاكبر في السوق المحلي وهي شريحة اصحاب الشمروعات الصغيرة والمتوسطة ,حيث ان المشروع معلق علي مصانع كبيرة بتورد له الخامات الداخلة في المنتج النهائي ,كمثال اليوم وهو السكر .

ياجماعة قبل ما تبتدي في مشروع السكر لازم تاخد بالك من سعر التوريد واللي هو العلامة الفاصلة في نجاح المشروع ,بمعني سيادتك لما تيجي تعمل دراسة للمشروع بتحسب سعر توريد طن السكر ليك علي اي اساس ؟؟؟

لازم تعرف ان السكر  والزيت خصوصأ والمواد الغذائية عموما اسعارها غير مستقرة بالمرة ,يعني تقريبا الاسعار زادات خلال السنة الاخيرة للزيوت النباتية فقط بنسبة 30% وللسكر زادت تقريبا 200 ج في الطن خلال فترة من منتصف 2015 الي ابريل 2016 وهو تاريخ نشر المقالة اللي حضرتك بتقرءها دلوقتي .

طيب علي اي اساس بيتم حساب سعر التوريد ,احسبه علي اعلي سعر متوفر في السوق حتي لو انت بتجيب اة هتجيب بسعر اقل ,طيب السبب ؟علشان تعرف المربح الصافي لو السعر خلال دورة راس المال الي حضرتك حسبت لها ارتفع للسعر الاقصي واللي هو انت عامل حسابك عليه ,وبكده تبقي انت فاهم انت بتعمل ايه ولو لاقدر الله حصل ارتفاع فغي الاسعار تبقي انت مستريح نفسيا .

النصيحة التانية ,تعبي يدوي ولا الي ,؟

مفيش شك ان الالي افضل 100 مرة من اليدوي ,توفير عمالة وانتاج لكل ساعة اعلي .طيب لو حضرتك لسه جديد في المجال وانت مش عارف تقرر هل تشتري الي ولا تعبي يدوي تعمل ايه ؟

بص اللي هيحكمك في الاختيار هو حجم الطلب علي بضاعتك ,يعني تقدر تبيع بكام خلال الشهر ,يعني مثلا لو مقدرتك 5 طن شهريا ,يبقي الفضل يدوي ,لان 5 طن تقريبا 5000 كيس وزن واحد كيلو ,مش مستاهل انك تشتري ماكينة سعرها 40000 جنيه علشان خمسة طن ,ولكن لو مقدرتك التعبوية كبيرة ,يبقي لازم تشتري ماكينة تعبئة الي .وهتكون الافضل للمشروع .

طيب ده هيولد سؤال تاني ,هو انا اعرف حجم الطلب قد ايه ازاي ؟؟؟

للمستجد مش هتعرف ,انت بتنزل البحر وانت ونصيبك ,اما لوانت مش مستجد ,يعني بتنزل بضاعة في السوق زي الرز او الزيت او خلافة بتعبي السكر وتنزله مع البضاعة ديه ومن تاني شهر او تالت شهر بتبدء تعرف حجم الطلب قد ايه .

الخلاصة لازم تربط امورك مع مورد قريب منك قبل ما تبدء مشروع التعبئة للسكر لانه ديه القشاية الفاصلة في الموضوع .

للمعلومة : اغلب مصانع السكر الكبيرة ما بتديش سكر للتجار الصغيرين ,والحجة الغير مقبولة ,اتعامل مع 10 تجار كبار ولا اتعامل مع 100 صغيرين ,ولكن قليل الفهم مش عارف ان التاجر الصغير لو خد منه مباشرة هيعمل استقرار في سعر السكر في مصر بالاضافة ان مش هتكون في منافسة شرسة بين حيتان كبيرة ممكن توقع السوق كله ,وان الصغيرين لو كبرو فعددهم كبير فالمنافسة مش هتكون مؤذية لاي طرف او للمواطن .